Был донъяла ниҙәр бар?

“Росатом” корпорацияһы ВДНХ-ла экспозиция асырға йыйына. Күргәҙмәлә атом энергетикаһы үҫешен лайыҡлы кәүҙәләндереү өсөн 1,3 миллиард һум тоторға йыйыныуҙары бер кемде лә артыҡ ғәжәпләндермәне буғай. Ә бына унда СССР халыҡ комиссарҙары советы рәйесе урынбаҫары, Эске эштәр министры Лаврентий Берияның манекены торасаҡ тигән имеш-мимештәр оло ғауға ҡуптарҙы. Сталиндың тоғро хеҙмәттәше яҡшы етәксе булғанмы, әллә торғаны бер яуызмы – был хаҡта бәхәс сығарып тормайыҡ, әммә фәҡәт Лаврентий Павлович Советтар Союзында атом проектын етәкләүе мәғлүм. Тап уның ойоштороу һәләте һәм энергияһы арҡаһында ғына илебеҙ атом ҡалҡаны булдырып өлгөрҙө, өсөнсө донъя һуғышына юл ҡуйылмай. Был тарихи шәхес кемгәлер оҡшаймы-юҡмы, атом энергетикаһы тураһында һүҙ барғанда уны бер нисек тә урап үтеп булмай инде.

Танылған профессор-вирусолог Анатолий Альштейн фекеренсә, көндәрҙең һалҡын тороуы ҡәһәрле вирусҡа саҡ ҡына ла зыян килтермәй. Киреһенсә, ғалимдар коронавирус өлгөләрен нәҡ һыуыҡ шарттарҙа һаҡлай икән. Абруйлы “Journal of Internal Medicine “ медицина журналы мәғлүмәттәре: коронавирус менән еңел формала ауырыған кешеләрҙең дә 86 проценты еҫ һәм тәм юғалтҡан була. 15,3 процент кешеләр сирләгәндән һуң 60 көн үткәс тә тәм һәм еҫте тоймайҙар, 4,7 процент кешеләр – ярты йылдан һуң да юғалтған һәләттәрен тегеҙә алмайҙар.

Ҡысытмаған урынды тырнау тап шул булалыр инде! Бөтә донъя башҡорттары ҡоролтайы Санкт-Петербургта Әхмәтзәки Вәлиди бюсын алып ташлауҙы талап итеү тураһында мәғлүмәт баҫылып сығыуға бәйле прокуратураға һәм Санкт-Петербург дәүләт университетына рәсми хаттар яҙҙы. Эш ниҙә һуң? «47news» баҫмаһы хәбәр итеүенсә, беренсе курс студентының әсәһе мөрәжәғәте буйынса прокуратура тикшереү үткәрә, бюсҡа нацизм билдәләре хас тигән һығымтаға киләләр. «Nation News» мәғлүмәте буйынса, Санкт-Петербург дәүләт университетында прокуратураның талабына ҡаршы килмәҫкә һәм бюсты алып ташларға хәл иткәндәр. Ҡоролтай хатында яҙыла - Санкт-Петербург дәүләт университеты биләмәһендә урынлашҡан бюст Әхмәтзәки Вәлидиҙең фәнни ҡаҙаныштарын таныу йөҙөнән ҡуйылған һәм уны донъяның фәнни йәмәғәтселегендә абруй ҡаҙанған ғалим-төркиәтсе булараҡ һынландыра. Бюст 2008 йылдың йәйендә университеттың филология факультеты биләмәһендә ҡуйылған. Авторы — Өфө скульпторы Владимир Дворник. Бюст менән бер үк ваҡытта Санкт-Петербург университетында фәҡәт Әхмәтзәки Вәлиди исемендә Төрки тикшеренеүҙәр үҙәге асылған, ти. Ә Әхмәтзәки Вәлиди фашист түгел икәнлеген теүәл аҡыллы кешеләргә аңлатып тороуҙың һис тә кәрәге юҡтыр!

Башҡортостанда матур датала – 21 ғинуарҙа (21.01.2021) 102 пар сәстәрен сәскә бәйләй. Никахты теркәү ғаризаларҙың күпселеге Өфөнөң ЗАГС бүлектәренә бирелгән.Хәтерегеҙгә төшөрәбеҙ, 2021 йылда туйҙар өсөн тағы ла бер матур дата көтөлә – 12.02.2021. Был көн йомаға тап килә.

Кәрт уйнай беләгеҙҙер инде: дама валеттан көслөрәк, әммә король үҙен еңә. Гендер, йәғни енес тигеҙлеге менән ҡыйыҡтары киткән Европала быуат-быуат килгән ошо тәртипте лә үҙгәртергә булғандар. Нидерландыла суд психологияһы белгесе Инди Меллинк, ә ниңә дама ( ҡатын-ҡыҙ) королдән (ир-ат) хәлһеҙерәк булырға тейеш, ошондай уйындар менән енестәр тигеҙһеҙлеге кеше аңына һеңдерелә, тигән һорау ҡуя ла, яңы кәрт сығарыуға тотона. Унда валет –бронза ҡалҡан, дама – көмөш тәңкәләр, король – һум алтын. Меллинк ханым үҙе әйткәнгә үҙе ышанамы – билдәһеҙ, әммә был бизнесы ярайһы йәйелә башланы – бер-нисә айҙа 1 500 комплект яңыса кәрттәрен АҠШ, Германия, Франциянан заказ менән алдыралар.

Дрон – пилот идара итмәгән осоу аппараты. Мәскәүҙең “Лужники” стадионында “Ховер” компанияһы такси итеп эшләтеләсәк дрондарға һынау үткәрә башлаған. Бөтәһе лә уңышлы барһа, сәғәтенә 200 километр тиҙлектә 100 километрға тиклем араға икешәр пассажирҙы ташый аласаҡ, ти. Ҡанатлы такси 150 метрға тиклем бейеккә күтәрелергә һәләтле. Дрон менән кеше идара итмәүҙең ыңғай яҡтары байтаҡ. Мәҫәлән, юл ҡағиҙәләре теүәл күҙәтеләсәк, юғиһә, һауала ла иҫерек водителдәр елдерә башлаһа, эш харап бит.

Такси тигәндәй, Мәскәүҙә бер ҡатын Шереметьево аэропортының бер осонан икенсеһенә барыу өсөн такси яллай. Ара – 7 саҡрым, ғәҙәттә 500 һум хаҡ ҡуйыла икән. Әммә был водитель ҡомһоҙлоғона баш була алмайынса 17 мең һум талап итә. Пассажир бәхәсләшеп тормай, һоралған аҡсаны бирә, ләкин шундуҡ транспорт полицияһына мәрәжәғәт итә. Таксист аҡсаны кире биреп кенә артабан эҙәрлекләүҙәрҙән ҡотола ала.

Санкт-Петербургта 33 йәшлек ир шәрәмәте 58 йәшлек табибәнең битенә йоҙороҡ менән тондора. Был ғына аҙ булып күренгәндер – педиатрҙың күҙҙәренә баллончиктан боросло газ һиптерә. Бахыр табибә үҙе дауаханаға һалына. Ә бәхәс ниҙән китә һуң? Атай кеше балаһына ниндәйҙер вакцина ҡуйҙырыуҙы талап итә, педиатр тап ул укол был осраҡта кәркмәй, тигән фекер әйтә. Эйе, балаларыбыҙҙы барыбыҙ ҙа яратабыҙ, уларға иң яҡшыһын теләйбеҙ, әммә был юҫыҡта ла саманы үтеп китергә һис ярамай! Атай (әсәй) булыу енйәт ҡылырға этәргес көскә әйләнмәһен ине, киреһенсә, тотҡарларға тейеш бит.