Вахтовиктар ҡайта алмай ултыра

Башҡортостан вахтовиктары Приморьела ҡайта алмай ултыра. Радий Хәбиров ошо проблеманы хәл итеү менән шөғөлләнә

«Өфөнефтемаш» компанияһы эшселәре Владивостоктан ҡайта алмай. Эшселәргә бер нисә ай буйына хеҙмәт хаҡы түләмәгәндәр, билетҡа ла аҡсалары булмағас, өйҙәренә ҡайтып етә алмағандар. Улар яҙҙырған видеомөрәжәғәтте Башҡортостан юлдаш телеканалы эфирында күрһәткәс, аҡса табылған. Кисә 38 кеше самолетҡа билет алған, ә директор эш хаҡы буйынса бурысты Яңы йылға тиклем түләп бөтөрөргә вәғәҙә биргән.

Шуға ҡарамаҫтан, Хәбиров Дәүләт хеҙмәт инспекцияһына һәм Хеҙмәт министрлығына «Өфөнефтемаш»ты тикшерергә ҡушты, ғәйеплеләр яуаплылыҡҡа тарттырылһын өсөн шәхсән күҙәтермен тип өҫтәне.

«Язаның ҡотолғоһоҙ булыуы ғына беҙгә артабан ошондай хәлдәргә юл ҡуймаҫҡа мөмкинлек бирер. Беҙҙә ай һайын 100 меңдән ашыу кеше вахтаға юллана. Күптәре оҙон аҡса эҙләп сығып китә, кемдер үҙенең ҡалаһында йәки ҡасабаһында эш таба алмай. Шуға ла мин республикала эш урындары булдырғандарҙың бөтәһен дә ҡулда күтәреп йөрөтөргә кәрәк тип әйтәм», — тине республика башлығы.

Сығанаҡ: Башинформ