Минең кәрәгем ҡалманы...

Иртә таңдан эшкә китеп барышым ине. Ҡаршыма күптән күрешмәгән танышым килеп сыҡты. Күрше йорттарҙа ғына йәшәһәк тә, донъя артынан ҡыуа-ҡыуа, хатта телефон номерҙарыбыҙҙы ла юғалтышып бөтөргәнбеҙ. Тиҙ-тиҙ булһа ла, хәл-әхүәл белешә башланыҡ. “Нинаның үлгәнен ишеткән инеңме? 2 ғинуарҙа ерләнек", – тине танышым. Ошо хәбәрҙән күҙ алдарым ҡараңғыланып китте. Әле ҡасан ғына аралашып йәшәгән Нина апай миңә бик тә йәл тойолдо. Ай-һай танышымдың бөтә нескәлектәр тураһында һөйләшеп торорға ваҡыты юҡ ине. Мин дә төпсөнмәнем. “Нисек?"– тигән һорауыма: "Өсөнсө ҡаттан йығылып төшкән", – тип кенә әйтте лә танышым үҙ юлында булды. Шулай ҙа эстән генә 57 йәшлек ҡатындың тормошо бына шулай тамамланыуы меңләгән һорауҙы яуапһыҙ ҡалдырҙы. “Яңылыш йығылғанмы, әллә үҙе ташлағанмы?” Журналист ҡыҙыҡһыныуым көслө булғанға күрә генә лә мин, һис шикһеҙ, был һорауға яуап табырға тейеш инем. Нина апай тыумышы менән Ижевск ҡалаһынан ине. Ғүмерлеккә тип һайлаған иренең, ҡыҙғаныс, ғүмере оҙаҡ булмай. Бер-бер артлы тыуған Саша менән Катяны етем ҡалдырып, 36 йәшендә донъя ҡуя. Ҡаҙандың бер бүлмәле барагында көн күргән ханым, балаларҙы аслы-туҡлы ҡалдырмаҫ өсөн, көндө төнгә ялғап эшләй. Балаларға әсә наҙы бирергә, тәрбиәләргә ваҡыты ла булмай. 16 йәшенә еткән Сашаһының насар компанияға эләккәнен абайламай ҙа ҡала. Был турала Нина апай белгәндә, эш инде уҙған була. Егетте, ҡараҡлыҡта ғәйепләп, төрмәгә ултырталар. Өҫтәүенә, ҡыҙы ла мәктәпте бөтөр-бөтөрмәҫ йөккә уҙа. Уныһы ла әсә йөрәген телгеләй. Яратҡан кешеһе, бала буласағын белгәс, һыуға батҡан кешеләй юҡҡа сыға. "Нисек тә тырышырбыҙ әле, үҫтерербеҙ", – тип, Нина ҡыҙын бала табырға күндерә. Бәләкәс Карина тыуа. Ҡара көндән һуң яҡтыһы килә тигәндәй, барактарҙы емерә башлағас, Нина апайҙарға өс бүлмәле фатир бирәләр. Шулай итеп тар ғына бүлмәлә көн күргән ғаиләнең тормошо иркенәйеп китә. Шул ваҡыт Саша ла ҡайта. Белеме, стажы булмаған егетте бер ҡайҙа ла эшкә алырға теләмәйҙәр. Шулай йөрөй торғас, ул үҙенән олораҡ бер ҡатынға эйәләшә. Һуңынан уға йортҡа инә. Быныһын да тыныс ҡына кисерергә тырыша Нина апай. Эскесе ҡатындың улын тура юлға баҫтырмаясағын яҡшы аңлай ул. Әммә нимә эшләтһен инде һуң? Төрмәнән наркоман булып ҡайтҡан Сашаһы өсөн, бәлки, уныһы яҡшыраҡ булғандыр әле. Уның ҡыланыштарын күрмәйсә, әсә йөрәге бер аҙ ғына булһа ла тыныс йәшәгәндер. Шул ғәмәле 28 йәшендә гүргә алып та китә Сашаны. "Передозировка", – ти табибтар. Быныһын да кисерҙе Нина апай. Ейәнсәре Каринаны бигнрәк тә яратып үҫтерергә тырышты ул. Әйтерһең дә балаларына бирә алмағанды ошо балаға бирергә теләй ине. Катя әле бер, әле икенсе ир менән йөрөп арығас, "нормальный" күренгән бер ирҙе эйәртеп ҡайтты. Ҙурлап туй яһанылар. Кейәү уларҙа йәшәп ҡалды. Ауылдан булғас, Ҡаҙанда уның фатиры юҡ ине. Әммә ул, ысынлап та ла, бик егәрле, аҙ тауыш ҡуптарырға яратҡан ир-ат булып сыҡты. Нина апай кейәүенә бер ҙә зарланманы. "Йәшәһендәр генә", – ти торҙо. Әммә Катяның әсәһе менән бер фатирҙа йәшәһе килмәне. Икенсе балаһын алып ҡайтҡас, фатирҙы бүлеү мәсьәләһе килеп баҫты. Нина инәй, бахыр, уныһына ла ҡаршы килмәне. Тормошон нисек башалған булһа, шуға кире ҡайтты тиһәң дә була. Фатирын һатып, ҡыҙына ике бүлмәлене биреп, үҙенә тораҡтан бер бүлмәлек кенә аҡсаһы ҡалды. "Ярай әле, етә миңә", – тип күрше йортҡа күсенде. Тағы бер нисә көндән юлымда тағы теге танышымды осраттым.