Нимә ул машина урыны һәм уны нисек законлаштырырға?

Машина урыны — бинаның йәки ҡоролманың бер өлөшө, унда тик транспорт сараларын ғына урынлаштырырға мөмкин. Ул ҡойма йәки төҙөлөш конструкциялары менән сикләнмәй, әммә уның сиге кадастр иҫәбенә ҡуйылырға тейеш.

Ихатала, юл ситендәге йәки ер өҫтөндәге туҡталыштарҙағы парковка урындары машина урыны була алмай.

Машина урындарының ҙурлығы буйынса сикләүҙәр юҡ. Уның сиктәрен бинаның проект документацияһында күрһәтәләр һәм иҙән йәки ҡыйыҡ өҫтөндә билдәләр менән билдәләйҙәр.

Машина урынын үҙ милкеңә нисек теркәргә?

2017 йылдың 1 ғинуарынан һуң файҙаланыуға тапшырылған күп фатирлы яңы йорттар өсөн:
Йортто файҙаланыуға тапшырыуға рөхсәт биргән орган машина урындарын кадастр иҫәбенә ҡуйырға тейеш. Милекселәр «Росреестр»ҙа машина урынына милек хоҡуғын теркәй ала.
Документтарҙан өлөшләтә ҡатнашыу тураһында килешеү, ҡабул итеү-тапшырыу акты һәм дәүләт пошлинаһы түләү тураһында квитанция (2000 һум) кәрәк.

2017 йылдың 1 ғинуарына тиклем автотуҡталышта дөйөм милек хоҡуғында өлөш булараҡ теркәлгән машина урындары өсөн:
Өлөш хужалары, машина урыны сиктәрен билдәләп һәм милек хоҡуғын теркәп, үҙ өлөшөн бүлә ала.
Кадастр иҫәбенә алыу һәм милек хоҡуғын теркәү тураһындағы ғариза менән кадастр инженерына һәм «Росреестр»ға мөрәжәғәт итегеҙ. Шулай уҡ милекселәрҙең дөйөм йыйылышының мөлкәт менән файҙаланыу тәртибен билдәләү тураһындағы килешеүе йәки ҡарары кәрәк буласаҡ.

Әгәр машина урыны элек торлаҡ булмаған бина сифатында теркәлгән булһа, нимә эшләргә?

Элек бирелгән документтарҙы алмаштырыу талап ителмәй. Әммә милексе үҙенең күсемһеҙ милек объекты тураһындағы мәғлүмәттәрҙә машина урыны тураһында мәғлүмәт булыуын теләһә, ул «Росреестр»ға Берҙәм дәүләт күсемһеҙ милек реестры мәғлүмәттәренең үҙгәреүен иҫәпкә алыу тураһында ғариза бирә ала. Шул уҡ ваҡытта, торлаҡ булмаған бинаға хоҡуҡты билдәләүсе документтар тапшырырға кәрәк.

Йорт ихатаһында парковка урынын законлаштырып, ҡойма ҡуйырға мөмкинме?

Быны үҙ белдегең менән эшләү законһыҙ. Әгәр йорт яны биләмәһе дөйөм милектә икән, дөйөм йыйылышта ҡойма конструкцияһы ҡуйыу тураһында ҡарар ҡабул ителергә тейеш. Башҡа осраҡтарҙа мәсьәлә Башҡортостандың Ер һәм мөлкәт мөнәсәбәттәре министрлығы ҡарамағында – ер участкаһы ҡуртымға бирелергә мөмкин.

#Аңлатабыҙ_Башҡортостан