Ришүәт суммаһы күпме

"Йыш ҡына ришүәтселек мәғариф, төҙөлөш, торлаҡ-коммуналь хужалыҡ кеүек социаль өлкәләрҙә асыҡлана. Был “көнкүреш ришүәтселек" менән граждандар башлыса көндәлек тормошта осраша", — тип билдәләне министр.

Мәҫәлән, ҡайһы бер белем биреү учреждениелары етәкселәре хеҙмәткәрҙәрҙән бюджеттан дәүләт ярҙамы рәүешендә иҫәпләнгән дәртләндереү түләүҙәренең бер өлөшөн уларға бүләк итеп тапшырыуҙы талап итә. Хеҙмәткәрҙәр иһә, начальниктарға буйһонған һәм бойондороҡло хәлдә булғанлыҡтан, был шарттарға ризалаша, ай һайын ҡулаҡса тапшыра йәки банк картаһына аҡса күсерә.

"Бөтәһе 52 ошондай факт асыҡланды, белем биреү учреждениеларының 10 етәксеһенә ҡарата енәйәт эштәре ҡуҙғатылды. Шул уҡ ваҡытта алынған ришүәттәрҙең дөйөм суммаһы ҡайһы берҙә 3 миллион һумдан ашып киткән, — тип хәбәр итте чиновник. - Ришүәтселек енәйәттәренең тағы өстән бер өлөшө мутлашыу формаһында башҡарыла, вазифалы кешеләр, вазифаһын файҙаланып, ышанысты боҙоп, законһыҙ эштәр ҡыла. Бындай енәйәттәр төҙөлөш тармағына, бюджет өлкәһенә һәм эшҡыуарлыҡҡа хас. Бөтәһе 275 факт асыҡланған.