+25 °С
Облачно
Новости
30 Декабря 2016, 07:20
Яңы йыл менән, дуҫтар!
Уралыма, бына, йыл яңыртып,
Уралыма, бына, йыл яңыртып,
Байрам бүләк итә ер-күгем.
Аҡ моңдарға сорнап яуған ҡарҙар
Керпектәргә элә бөртөгөн.
Шәмдәлдәрҙә, беҙҙең күңелдәрҙә
Төндәр яҡтырырлыҡ нурҙар бар.
Йөрәктәрҙе беҙҙең асып һалыр,
Күтәреп тә алыр йырҙар бар.
Һуға сәғәт!.. Матур
теләктәрҙең
Түбәһендә ваҡыт - тантана.
Ҡотлауҙарҙың йылылары йәндә
Ҡыуаныстар булып ятлана.
Күтәрәйек, дуҫтар,
байрам һыйын,
Күтәреләйек беҙ үҙебеҙ!
Яңы йылға күсһен табын йыры,
Яңы йылға күсһен һүҙебеҙ.
Именлектә беҙҙең йәшәүҙәрҙе
Ерем-күгем туйлай урамда.
Ризалатып, риза булып донъя
Яңы йылды башлай Уралда.
Хәсән НАЗАР.
