Ветеринарҙар ҙа тотонғас, таж-вирус ҡаршы тора алмаҫ

Комсомольск, Миндәк, шулай уҡ ҡаланың дүрт балалар баҡсаларындағы дежур төркөмдәрҙең ҡабул итеү бүлмәләре “ҡайнар томан” ысулы менән дезинфекцияланды.

“Ҡайнар томан” менән ветеринарҙар эш итә. Ике ҡоролмалары бар. Эште артабан киңерәк йәйелдереүгә тотҡарлыҡ - махсус дезинфекция препараттары етмәү икән. Мал табиптары фермаларҙы, башҡа малсылыҡ биналарын эшкәртеү өсөн 3-сө класс хәүефлектә препараттар ҡуллана торған, кеше йәшәгән һәм эшләгән биналарҙа 4-се класс ҡына рәхсәт ителә.

-Ундай препараттарға заказ яһаныҡ, киләһе аҙнала килтерелә икән, үҙебеҙҙең аптека аша һатыр инек, - тип самалай райондың баш ветеринар табибы Радис Таһиров, - Әлбиттә, “ҡайнар томан” эффектлыраҡ, әммә дезинфекция шыйыҡсаһы бар икән, һәр кем баҡса һиптергесе (опрыскиватель) менән дә эш итә ала бит.

Ветеринарҙар ҙа таж-вирус менән көрәшкә егелеү бик өмөтлө күренештер буғай. Эпизоотияларға (малдар араһында йоғошло ауырыуҙар таралыу) ҡаршы тороу буйынса апаруҡ ғәмәли тәжрибәгә эйә бит улар.

Белешмә:

“Ҡайнар томан” – зарарһыһландырыу шыйыҡсаһы генератор эсендә юғары баҫым һәм температура йоғонтоһо аҫтында газ (томан) хәлендә тышҡа урғыла. Шыйыҡса тамсылары ныҡ ваҡ булғас, күпмелер ваҡыт болот булып эленеп тора, тирә-йүндәге бөтә тишек-тошоҡтарға үтеп инеп, бар зарарлы микроорганизмдарҙы юҡ итә.