Яман даныбыҙҙы таратмаһындар!

Донъяла барған пандемия социаль мөнәсәбәттәрҙе ҡырҡа киҫкенләштерҙе буғай. Социаль селтәрҙәрҙә”....Донъя буйлап тегеләй-былай йөрөгән байҙар инфекция тартты, ә төп ауырлыҡ ярлы-ябаға иңенә төшә”, - кеүегерәк фекерҙәр йыш күҙгә салына. Һүҙ көйөнсә генә ҡалмай бит әле ҡайһы саҡ. Иркутск өлкәһенең Усть-Кута ҡалаһынан ҡатын ике балаһы менән Таиландта ял итеп ҡайталар. Һуңынан анализ ете йәшлек малайҙа корнавирус булыуын күрһәтә. Урындағы кешеләр социаль селтәрҙәр аша был ғаиләнең адресын белеп ҡалалар ҙа, интернет аша йәберләй, янай башлайҙар. Хатта, полициянан һаҡ ҡуйырға тура килгән, ти! Ә икенсе тапҡыр үткәргән анализ сабыйҙа ҡурҡыныс сир юҡ икәнен күрһәтте.

НТВ телеканалында Учалыбыҙҙы ла телгә алдылар – халыҡ сирлеләрҙең адрестарын хәбәр итеүҙе талап итәләр тип.... Әллә инде, интернетта кемдер –үҙ фекерен белдергән өсөн бөтә төбәктең яман данын таратыу дөрөҫмө? Нисек кенә булмаһын, ҡоторған коронавирус һылтауы менән үҙебеҙ ҙә ҡотормайыҡ әле, йәмәғәт!