Балаларҙың яратҡан "врач әбейе"

Балалар уны урамда күреп ҡалһа, "Рәфилә әбей", "врач әбей" тип сәләмләй. Рәфилә Сәйфүтдинова оҙаҡ йылдар Илсеғол участка дауаханаһында балалар шәфҡәт туташы булып эшләй.

-Был һөнәрҙе һайлауым осраҡлы түгел, мин бала саҡта ата-әсәйем йыш сырхай торғандар ине, шул мәлдә, эх, табип булһам тиҙ генә ярҙам итер инем, тип уйлай торған инем. Ошо теләгем медицинаға килтерҙе лә инде, - ти ул.

Уның дауаханала эшләй башлауына 22 йыллап ваҡыт үткән, тәжрибәле, коллективта үҙ кешегә әйләнгән хеҙмәткәрҙәрҙең береһе. Һәр эшкә төплө ҡа­рарға өйрәнгән, бурысын еренә еткереп үтәгән белгестең ҡул аҫтында дауаланыу алған балаларҙың иҫәбе-хисабы юҡ. Күрше-тирәләге ете ауылдан балаларҙы ҡабул итәләр. Сабыйҙарға патронажға йөрөү, прививкалар яһау, медицина процедуралары уҙғарыу уға ышанып тапшырылған.

-Мин ҡараған балалар күптән үҫеп үҙҙәре атай-әсәй булып бөттөләр инде. Онотмайҙар, шылтыратып хәлемде белешәләр, урамда осраһалар йыраҡтан уҡ сәләм биреп үтәләр, - ти Рәфилә ханым. Рәфилә Сәйфүтдинова хаҡлы ялда булһа ла әле лә сафта, кескәйҙәргә бәхетле бала саҡ бүләк итеп, уларҙың һаулығын ҡайғыртҡаны өсөн, һәм әлбиттә, хеҙмәтегеҙ, яуаплылыҡ тойоуығыҙ өсөн ҙур рәхмәт!