Һеҙҙең алда баш эйәбеҙ!

Күҙгә күренмәгән дошман – коронавирус менән алышҡан табиптарыбыҙҙың хеҙмәте батырлыҡҡа тиң. Учалыбыҙҙа ла бала тыуҙырыу йортон ковид госпиталенә әйләндергәндән һуң бер төркөм медиктарға ябыҡ дауаханала икешәр аҙна вахта менән эшләргә тура килде. Ошо дәүер оҙаҡ йылдарға онотолмаҫ тарих булып иҫтә ҡаласаҡ. Яҡташтарыбыҙ һуңғы ауырыуҙы һауыҡтырғанға ҡәҙәр эшләнеләр. Тынсыу костюмдарҙа, ғәҙәти булмаған ауыр шарттарҙа һигеҙәр сәғәт хеҙмәт итеү, әлбиттә, еңелдән булманы уларға. Йәйге эҫелә тирләп-бешеп, бер нисә ҡат битлек аша тын алып һәр ғүмер өсөн көрәшә улар. Пациенттарҙың һауыҡҡанын күреп улар үҙҙәре лә тырышлыҡ һөҙөмтәләренә ҡыуана.