Сикләүҙәрҙе алыуҙың икенсе этабына күсмәйбеҙ,

Кисә Хөкүмәттә үткән оператив кәңәшмә коронавирусҡа бәйле хәлде тикшереүҙән башланды. Башҡортостан Башлығы Радий Хәбиров белдереүенсә, республикала инфекцияның таралыу кимәле тигеҙ, тик ҡатмарлы.

- Хәлдең әллә ни яҡшырыуын күрмәйбеҙ. 1 сентябргә яҡшыраҡ күрһәткестәр менән сығырға тигән бурыс ҡуйғайныҡ та, әлегә тойолмай. Хәҙер 1 сентябрҙән мәктәптәр, балалар баҡсалары асылһа, кешеләр тағы ла артасаҡ. Хәлдәрҙең тағы ҡатмарлашыуы бар. Беҙ әлегә сикләүҙәрҙе алыуҙың икенсе этабына күсмәйбеҙ, – тине Радий Хәбиров.

Һуңғы тәүлек эсендә коронавирус 36 кешелә табылған. Дөйөм зарарланғандар һаны – 6851 кеше.

15 августа кинотеатрҙар асылырға тейеш тигән һүҙ бар ине. Был турала ла Радий Фәрит улы үҙенең ҡарашын белдерҙе.

– Уларҙы асыуҙың яҡынса датаһы 15 август ине. Әлегә аныҡ ҡына бер нимә лә әйтеп булмай. Кинотеатрҙар әҙерләнһен, ә беҙ хәлгә ҡарарбыҙ. Эпидемиологик торошҡа ҡарап ҡарар ҡабул ителәсәк. Әгәр икенсе этапҡа күсмәйбеҙ икән, бер нимә лә асылмаясаҡ, – тине ул.

Фото: gtrk.tv

Альфия Мингалиева