Еңеүселәр менән танышығыҙ

Сираттағы еңеүселәребеҙҙе ҡаршы алығыҙ – Һәйтәк ауылынан Венера һәм Фәнит Шаһиевтар. Уларға бүләккә ҡулсатыр һәм бадминтон эләкте.

Был ғаиләне районыбыҙҙа белмәгән кеше һирәктер. Йәмәғәт эштәрендә ҡайнап, олоно – ололай, кесене – тиң күреп ғүмер итеүсе Шаһиевтар халыҡтың хөрмәтен күптән инде яулап өлгөргән.

Венера Камил ҡыҙы ғүмерен мәғариф өлкәһенә бағышлаған кеше. 38 йыл дауамында ул Һәйтәк мәктәбендә башланғыс класс уҡыусыларына белем биргән. “РФ-тың почетлы мәғариф хеҙмәткәре” исеменә лайыҡ.

Фәнит Арслан улы тормошон мәҙәниәт өлкәһенән тыш күҙ алдына ла килтерә алмай. Ул – БАССР-ҙың атҡаҙанған мәҙәниәт хеҙмәткәре. “Арғымаҡ” халыҡ театрының алыштырғыһыҙ художество етәксеһе. Хеҙмәт стажы 55 йыл. Әле булһа ижади эҙләнеүҙәр юлында Фәнит ағайыбыҙ. Ҡала-район кимәлендә уҙғарылған йөкмәткеле мәҙәни сараларҙың уртаһында ҡайнап, сағыу образдар тыуҙырып, йәне-тәне менән ижад мөхитендә ҡайнап йәшәй.

Шаһиевтар ике ул һәм бер ҡыҙ тәрбиәләп үҫтергәндәр. Бөгөнгө көндә һигеҙ ейән-ейәнсәрҙәрен, ике бүлә-бүләсәрҙҙәрен һөйөп ҡыуаналар. Бергә татыу ғүмер итеүҙәренә быйыл 49 йыл булған. Аллаһ бирһә, алдағы йылда алтын туйҙарын гөрләтергә яҙһын, тип ихлас күңелдән теләйбеҙ!

Хөрмәтле гәзит уҡыусыларыбыҙ, уйыныбыҙ аҙағына ла яҡынлаша. Киләһе шишәмбелә һуңғы бүләгебеҙ уйнатыласаҡ.