Данил – чемпион!

Венгрия  баш ҡалаһы Будапештта кикбоксинг буйынса  26-сы Донъя кубогына ярыштар үтте.   Рәсми исеме –“ 26th Hungarian Kickboxing World Cup 2021”. 45 илдән 3 меңләп спортсы көс һынашыуҙары  үҙе өсөн үҙе һөйләйҙер.

 Нисәмә илдә хәҙер “Учалы” атамаһын белеп ҡалдылар – Данил Панов юниорҙар араһында ике ауырлыҡ категорияларында  ( 74 һәм 79 килограмм)  алтын миҙалдар яуланы. Бының өсөн Австрия, Украина, Босния, Герцеговина, Венгрия, Италия, Болгария, бер ватандашыбыҙҙы ышаныслы рәүештә еңгән.

-Учалы ҡалаһында  Артем Бобров һәм Тимур Заманов менән бергәләп 150-ләп балаға күнекмәләр үткәрәбеҙ. Данил - 2003 йыл тыуған, быйыл 5-се мәктәпте тамамланы. Бик һәләтле һәм тырыш  егет, алда еңеүҙәре байтаҡтыр әле! – ти тренеры  Денис Ямалетдинов. Денис Айҙар улы  үҙе лә заманында бик тә уңышлы сығыш яһаған спортсы, һуңғы 9 йыл йәштәрҙе тәрбиәләү менән шөғөлләнә.  Ошондай уңыштарға өлгәшкән спортсыны ла, тренерҙарын да ихлас ҡотлайбыҙ!