Көнкүреш техникаһы һәм электроника ҡиммәтләнә.

Магазиндарҙа көнкүреш техникаһы һәм электроника ҡиммәтләнә. Рәсәйҙәр интернет-ресурстарҙа күҙәтеүҙәре менән бүлешә. Мәҫәлән, һуңғы ике аҙнала «Ситилинк»та ҡаты дисктың бер төрө — 11 690 һумдан 29 980 һумғаса, DNS магазинында Indesit һауыт-һаба йыуыу машинаһы 38 299 һумдан 119 799 һумғаса артҡан.

Өфөлә DNS онлайн-магазинында Honor ноутбуктарының хаҡы 81-130 мең һум булһа, Huawei — 107 -169 мең һум.

Apple ноутбуктары хәҙер 144-300 мең һум тора.

Петербургтың «Бишенсе канал»ында көнкүреш техникаһы баҙары аналитигы Руслан Воложкин һүҙҙәренсә, көнкүреш техникаһының арзанайыуын көтөүҙең мәғәнәһе юҡ. Әлеге ваҡытта хаҡ артыу — тауарҙарҙың  ҡиммәтләнеүенең тәүге тулҡыны ғына. Әгәр долларҙың курсы көйләнмәһә, хәл яҡшырмаһа, уның икенсе, өсөнсө тулҡыны булыуы мөмкин, тип иҫәпләй ул.

Хаҡты арттырыу — күберәк аҡса эшләргә тырышыу түгел, ә булған аҡсаны һаҡлап ҡалыу, сөнки яҡын арала сығымдар ҙа арта башлай.

24 февралдә Украиналағы махсус операция һәм Рәсәйгә иғлан ителгән санкциялар һөҙөмтәһендә һумдың баһаһы төштө. Быға тиклем доллар — 75 һумдан, евро 90 һумдан артмай ине.

16 мартта урындағы ваҡыт буйынса иртәнге сәғәт 11-гә Һаҡлыҡ банкында долларҙың курсы - 130,22 һум, евро - 140,6; ВТБ-ла - 130,9 һум, евро - 140,65; «Открытие» банкында - 126,15 һум, евро - 135.

https://www.bashinform.ru/news/economy/2022-03-16/v-strane-stremitelno-povyshayutsya-tseny-na-bytovuyu-tehniku-i-elektroniku-2729987