Яңы танк батальоны төҙөлә

Ҡала-райондың хәрби комиссары Сергей Симоновтан мәғлүм булыуынса, республикала йәнә бер исемле ирекмәндәр батальоны төҙөлә икән.

-Яңыраҡ хәрби әҙерлек үтергә Икенсе Салауат Юлаев исемендәге батальон йүнәлтелде, бар теләгәндәр унда ла эләгә алмағайны, - ти иптәш подполковник. – Һәм бына, сираттағы ирекмәндәр батальоны тураһында хәбәр алдыҡ, сөнки ирекмән булырға теләүселәр байтаҡ. Һәм барыһы ла фәҡәт Башҡортостан подразделениеларында хеҙмәт итергә теләй. Патриотлыҡ та ҙур роль уйнай, матди дәртләндереү ҙә, тәьминәт тә юғарыраҡ кимәлдә башҡарыла.  Был танк батальоны кемдең исемен йөрөтөр, әлегә билдәһеҙ. Аңлашыла, танкистар ғына алынмаясаҡ, барыһы ла күп талап ителәсәк.

   Комиссар аңлатыуынса, ирекмән булып хәрби хеҙмәт үтмәгән, әммә  урта йә юғары белемгә эйә ирҙәр ҙә яҙыла ала. Рядовойҙан алып прапорщик дәрәжәһенә тиклем – 18 йәштән 60 йәшкә ҡәҙәр ирҙәрҙең ғаризалары ҡарала, һаулыҡтары ирек бирә икән – 65 йәшкә тиклем ирҙәр ҙә алыныуы мөмкин. Ауыр статьялар буйынса язаға тарттырылмағандар икән, элек хөкөм ителгәндәр ҙә мәрәжәғәт итә ала. Ваҡытында эскеселек менән шөғөлләнеп тә, аҡылдарына килгәндәр ситкә тибелмәй - һәр осраҡ айырым рәүештә ҡарала.

Ә бына ҡатын-ҡыҙҙарҙы алмайҙар – медицина һәм элемтә белгестәренән тыш.

Контракт ваҡыты -6 ай һәм унан күберәк.

Ирекмәндәр медицина тикшереүен үҙебеҙҙең үҙәк ҡала дауаханаһында, сиратһыҙ үтә.

  Ә теләүселәр районыбыҙҙа байтаҡ. Быйылғы март айынан ғына йөҙгә яҡын  яҡташыбыҙ хәрби комиссариат аша контракт төҙөгән.

-Иң мөһиме – кешенең үҙенең теләге булыуы. Был осраҡта тәү сиратта  Учалы ҡалаһы һәм районының хәрби комиссариатына шәхсән килер кәрәк, эш көндәрендә, 8.00-17.00 сәғәттәрҙә ҡабул итәбеҙ, барыһын да яҡшылап төшөндөрөрбөҙ, - ти Сергей Алексеевич. –Комиссариатта яҡынса белешмәләрҙе    6-12-41, 6-16-44            телефондары буйынса алырға була.

Өфөгә, 122, +7 (347) 218-19-19, +7 (347) 248-29-31 телефоны буйынса шылтыратып һорашырға ла мөмкин, шулай уҡ  махсус сайт та булдырылған, электрон адресы -  башбат.рф.