“Оскар”ың ары торһон!

Хәҙер инде дүртенсе йыл рәттән республикабыҙҙың иң популяр телеканалы “Тамыр” селтәре” тип аталған  фестивалгә мәктәп студияларын йыя. Бөтә Башҡортостандан иң яҡшыларҙы. Быйыл бындай хөрмәт Учалы Ижад һарайы эргәһендәге “Ҡусҡар” театр медиа-студияһына күрһәтелде. “Ҡусҡар көндәлеге” программаһын алып барыусы йәштән-йәш журналистар һәм уларҙың әсәләре, студия етәксеһе, башҡаһынан тыш танылған ҡул эштәре оҫтабикәһе Альбина Ғәлиева мастер-кластарҙа ихлас шөғөлләнде, белем камиллаштырыу тураһында сертификаттар алдылар, бик ҙур ҡыҙыҡһыныу менән Телеүҙәк биләмәләрендә экскурсия башҡарҙылар. Һуңынан иһә тантаналы рәүештә “ҡыҙыл балаҫтан” атлап, ижади эшмәкәрлектәре өсөн “Яңы формат” номинацияһында бүләкләнделәр. Америкала “Оскар” кинопремияһы алыу ҙа был тиклем шатлыҡ килтермәҫ ине буғай улар һәм беҙҙең өсөн! Исемдәрен атап китәйек: Суфия (10 йәш, полилингваль мәктәптең 4 а класында уҡый), Сәлимә (7 йәш, полилингваль мәктәптең 1 а класында уҡый), Аҡсура (4 йәш, 18-се балалар баҡсаһына йөрөй). Собханаллаһ, күҙ генә теймәһен үҙҙәренә!

“Ҡусҡар” студияһы тураһында яҙғайныҡ “Яйыҡ” гәзитендә. Альбина Шәфҡәт ҡыҙы түбәндәгене өҫтәне:

 -Медиа студиябыҙ шәхси, ғаилә проекты булараҡ башланды (Динар  Сафин һәм Альбина Ғәлиева 6 бала үҫтерәләр). Тәүҙә тик үҙебеҙҙекеләр генә ҡатнашты. Сентябрҙән иһә эшмәкәрлек даирәһе киңәйтелде, Ижад һарайы базаһында башҡа балалар ҙа ылыға башланы.

  “Ҡусҡар”студияһы эштәрен Учалы телеканалында күрһәгеҙ, кемдәр икәнлеген белеп ҡуйығыҙ. Ә мөмкинлек бар икән, мотлаҡ интернетта төркөмдәрен инеп ҡарағыҙ - https://vk.com/club219820247 Үкенергә тура килмәҫ!