"Беҙ еңәсәкбеҙ, күп ҡалманы! Улым дошманды үткәрмәне!"

-Беҙ еңәсәкбеҙ, күп ҡалманы! Улым  дошманды үткәрмәне! – тип сығыш яһаны матәм митингында ҡаһарман яугирҙың атаһы Алмас Әнүәр улы Әхмәтов.

Ҡаланың 5-се мәктәбендә махсус хәрби операцияла һәләк булған Әхмәтов Айҙар Алмас улы иҫтәлегенә мемориаль таҡтаташ асылды. Район хакимиәте башлығы Руслан Ғиләзетдинов тулҡынлындырғыс телмәр тотто, йәш быуын сафҡа теҙелеп, байраҡ елберҙәтеп атланы, тынлыҡ минуты иғлан ителде, гөлләмәләр һалынды.

Айҙар Алмас улы 1989 йыл тыуған. Ҡалала 5-се мәктәпте тамамлай. Бик тә уңышлы кикбоксинг менән шөғөлләнгәс, тормош юлын ошо йүнәлешкә бәйләй – 2008 йыл Магнитогорск физик культура колледжын, 2013 йыл –Силәбе дәүләт педагогия университетын тамамлай. «Газпромнефть – Заполярье» компанияһында хеҙмәт итә. Махсус хәрби операция башланғас, “Вагнер” хәрби компанияһына ирекмән булып яҙыла. Штурм отряды составында нацистарға ҡаршы алыша.  Ҡыйыулыҡ һәм оҫталыҡ өсөн компанияның бихисап ведомство наградалары менән билдәләнә .2023 йылдың 14 ноябрендә батырҙарса башын һалғандан  һуң РФ Президентының Указына ярашлы  Ҡаһарманлыҡ орденына лайыҡ булды.

...Айҙарҙы үҙебеҙ ҙә белдек – шуҡ, шаян, ярҙамсыл, киң күңелле малай булып үҫте. Бала сағынан ҡурҡыуҙың ни икәнлеген белмәгәндер. Былтыр, теүәл бер йыл элек Артемовск эргәһендә һәләк булған взвод командирын алыштыра, оҫта етәкселек итә, һуңынан засадаға эләккән разведчиктарҙың сигенеүен ҡаплап ҡала. Ҡаты яраланһа ла, һуңғы патронға тиклем ут алып барыуҙы туҡтатмай,  ә ҡамауға алғастары, үҙен һәм дошмандарҙы ике ауыр граната менән шартлата... Йәнең йәннәттә булһын, Айҙар, беҙ һине юҡһынабыҙ, һинең менән ғорурланабыҙ!