Башҡортостан йәмәғәтселәре һайлауҙа күҙәтеүсе буласаҡ

Республиканың 24 коммерцияға ҡарамаған ойошмаһы Башҡортостандың Йәмәғәт палатаһы менән 2024 йылдың 15 мартынан 17-һенә тиклем Рәсәй Федерацияһы Президентын һайлауҙа тауыш биреүҙе күҙәтеүҙә ҡатнашыу тураһында килешеүгә ҡул ҡуйҙы.

Улар иҫәбендә – Рәсәй адвокаттары гильдияһы, Йәштәр йәмәғәт палатаһы, Башҡортостандың Муниципаль берәмектәр советы, Башҡортостан Республикаһының Журналистар союзы, Йәштәр сәйәсәте лигаһы, Бөтә донъя башҡорттары ҡоролтайы, Рәсәй эҙәрмәндәр хәрәкәте, Йәштәр яҡташлыҡтары ағзалары һәм башҡалар.

Документ коммерцияға ҡарамаған ойошмаларҙың көстәрен берләштерергә һәм һайлауҙың ғәҙеллеген, асыҡлығын тәьмин итергә әҙерлеген нығытты. Йәмәғәт палатаһы республиканың граждандар йәмғиәте вәкилдәре һайлау процесының бөтә этаптарына йәмәғәт контроле алып барыу мөмкинлегенә эйә булыуына гарантия булып тора.

– Беҙ Лига командаһы менән күҙәтеүсе булырға хәл иттек. Беҙгә тауыш биреүҙең бөтә механизмын өйрәнеү, уның нисек барғанын ҡарау һәм ошо хаҡта һөйләү ҡыҙыҡлы. Төп ролебеҙ – барыһы ла ғәҙел булһын өсөн күҙәтеү, – тине Йәштәр сәйәсәте лигаһы активисы Алёна Синицына.

Башҡортостанда һайлауҙарҙы күҙәтеү буйынса йәмәғәт штабы етәксеһе Лида Исаргакова билдәләүенсә, төбәктә президент һайлауҙа тауыш биреү барышында 10 меңгә яҡын күҙәтеүсе эшләйәсәк. Улар – табиптар, уҡытыусылар, эшҡыуарҙар, пенсионерҙар һәм хужабикәләр, студенттар һәм йәмәғәт эшмәкәрҙәре. Бөтә күҙәтеүселәр алдан әҙерлек үтә – һайлау процедураһы ҡағиҙәләрен, норматив-хоҡуҡи базаны һәм тауыш биреүҙең асыҡлығын тәьмин итергә мөмкинлек биргән бөтә кәрәкле ҡоралдарҙы өйрәнә.

– Башҡортостанда коммерцияға ҡарамаған сектор көслө, төбәк тормошонда әүҙем ҡатнашҡан битараф булмаған кешеләр күп. Әүҙем йәштәр бихисап. Улар илдең киләсәгенә битараф түгел, шуға күрә Башҡортостан биләмәһендә президент һайлауҙары ғәҙел һәм асыҡ үтһен өсөн барыһын да эшләргә әҙер, – тине Лида Исаргакова.

Әүҙем һайлау хоҡуғына эйә бәлиғ булған Рәсәй гражданы күҙәтеүсе була ала. Был статусты һайлап ҡуйылған вазифалы кешеләр, депутаттар, урындағы хакимиәт башлыҡтары һәм уларҙың хеҙмәткәрҙәре, шулай уҡ прокурорҙар, судьялар һәм һайлау комиссиялары ағзалары ала алмай. Башҡортостанда йәмәғәт күҙәтеүселәре булырға теләүселәр республиканың Йәмәғәт палатаһына мөрәжәғәт итә ала.