Башҡорт телен ныҡ яратҡан....

Байегетов Илнар Иршат улы 1997 йылдың 27 июнендә

Озерный касабаһында доньяға килгән.  Әсәһе Гөлшат Мөхәррәм ҡыҙы башланғыс кластар уҡытыусыһы, ә атаһы Иршат Әхмәтйән улы “Озерный” совхозында балта оҫтаһы булып эшләне (әлеге көндә мәрхум).

Илнар бала саҡтан кешегә  итәғәтле, әҙәпле булды. 7-се класҡа тиклем Озерный урта мәктәбендә уҡыны. Математика һәм гуманитар фәндәрҙе бик яҡшы белде, айырыуса башҡорт телен яратты, “Урал батыр” эпосын ятҡа һөйлане,  китап күп уҡыны. Мәктәп, район күләмендәге төрлө олимпиадаларҙа ҡатнашып, призлы урындар ала торғайны

Һуңынан  Екатеринбургтағы Суворов училищеһына керә һәм, алтын миҙалға тамамлап, Рязандағы Маргелов исемендәге хәрби десант училищеһына инә. Был мәртәбәле уҡыу йортон да “ҡыҙыл дипломға” тамамлауға өҫтәп, хәрби тәржемәсе квалификацияһы ла ала. Ныҡ зирәк ине шул! Севастополдә диңгеҙ пехотаһы часында хеҙмәт юлын башлай. 2022 йылдың мартында Мариуполь ҡалаһын дошмандарҙан таҙартҡанда батырҙарса һаләк булды. Ҡаһарманлыҡ, Шайморатов ордендары менан буләкланә.

Илнарыбыҙ, яҡшы уҡыуҙан тыш, спортты - йүгереү, йөҙөү, айырыуса, футболды яратты. Шуға ла, класташтары, ауыл йәштәре,уның иҫтәлегенә футбол турниры үткәрергә ҡарар иткәйне. Быйыл хәҙер инде икенсе тапҡырға үткәрелде.  Ярышты тантаналы  асыуҙа Илнарҙың әсәһе, ҡатыны, ҡәйнәһе, ярышты ойоштороусы Ильяс Насретдинов, ауыл Советы депутаты Нурдидә Вәлиевалар ҡатнашты.  (Ойоштороу мәшәҡәттәренән тыш, судья, комментатор булып ал-ял белмәй эшләгән Ильясҡа барыһы ла ныҡ рәхмәтле!)

Рәсәй гимны аҫтында ярыштың флагы күтәрелде. Илнарҙы иҫкә алырға һәм ярыш ҡарарға ололар, йәштәр, бала-саға күп йыйылды. 6 сәғәт буйына  дауам итте көсөргәнешле  алыштар. 1-се  урын һәм Күсмә кубокты  икенсе  йыл рәттән Килмәк командаһы яуланы, 2-се урын -Ураҙҙар, 3-сө урын - Озерный футболсылары. Төрлө сифаттарҙа турнирҙың иң яҡшы уйынсылары: Али Муродов  (Миндәк), Мирал Зарипов (Ураҙ), Рафиҡ Ишмөхәмәтов (Озерный), Айҙар Ибраһимов (Килмәк), Динар Таипов, Айрат Ишмәхәмәтов (Озерный), ә иң йәш уйынсы – Амангилденән Арсен Хәйруллин. Ин яҡшы уйынсылаға Илнарҙын класташы Фәнис Мәғәфуров призға  конвертта  иптәштәре йыйған аҡса тапшырҙы.

Турнир өлгөлө офицер иҫтәлегенә булғас, хәрби-ҡулланма бәйгеләр ҙә килешеп китте. Айтуған һәм Айҙар Әйүповтар, Алтынай Лотфулинналар АК-74 автоматын һүтеп-йыйыу, магазинға патрон тултырыу буйынса ярыштар ойошторҙо. Автомат менән эш итеүҙә Шамил Лоҡмановҡа тиңдәр табылманы, унан ҡала  - Динар Камалов һәм  Рафиҡ Ишмөхәмәтов. Ә яһаҡтар тултырыуҙа иң етеҙе Рафиҡ Ишмөхәмәтов, 2-се урында -  Гүзәлиә Мәғәфүрова, өсөнсө призер – Илнар Мурзабаев.

Бындай саралар байтаҡ сығым да талап итә. Илнарҙың туғандарынан тыш, булышлыҡ иткән башҡа  кешеләрҙе лә атап китеү урынлы булыр. Маһайыу өсөн түгел, һәр кем сауаплы эшкә хәленән килгән иғәнә индерә ала тигәнде дәлилләү өсөн! Бына улар: Азат Дауытов,  Айрат, Илһам,Рушан, Рафиҡ Ишмөхәмәтовтар, Илдар, Айнур Ниғмәтуллиндар, Сыңғыҙ Вәлиев, Эмиль Ғиниәтуллин, Эмиль Мәжитов, Илдар Мурзабаев, Ғәфүр Мәхәмәтов, Айгизәр Ҡаһарманов,  Ильяс Насретдинов, Раян Мәғәфүров, Фәтих ағай һәм Вадим Шәрәфетдиновтар,  Динар Камалов, Динар Таипов һәм башҡалар.  МХО-ла йөрөгән Динар Шәйхетдинов менән Айбулат Лотфуллиндарҙың да ихлас ҡушылыуҙары айырыуса әһәмиәтле һәм тулҡынландырғыс! Шулай уҡ Миндәк ауыл Советы вәкилдәре, эшҡыуарҙар Руслан Әйупов, Рим Ғәйфуллиндар, Айытбай хәҙрәт Ғарипов, Минзәлә Фазлетдиновалар сараның матур үтеүенә булышлыҡ итте. Турнир һәм тантананы  башынан аҙағына тиклем музыкаль яҡтан  биҙәгән Динар Насретдиновҡа айырым рәхмәт.

 Эйе, был йыйын “кәрәк булған өсөн” үткәрелгән сара түгел, халыҡтың үҙенең инициативаһы икәнлеген шул тиклем күп кеше ихлас ҡатнашыуы иҫбатлай. Бына, мәҫәлән, мәктәп ашханаһында  ике тапҡыр мул табын ҡоролдо. Барыһы ла ҡәнәғәт ҡалһын өсөн Ләлә Ишмөхәмәтова, Зөлфиә Ғарипова, Резеда Мәжитова, Резеда Насретдинова, Зәлифә Йомабаева, Эльвира Ниғмәтуллина, Илшат һәм Нурдидә Вәлиевтар, Розалия Лотфуллина, Данил һәм Элзара Ишмөхәмтовтар,  Шәүлиә Юнысова, Гөлсөм Сәғитдинова, Рәйлә Лотфуллина,  Нәбилә Ишмөхәмәтова, Земфира Ягановаларға  байтаҡ көс түгергә тура килә. Кемен генә алып ҡарама, йә ғаилә ағзалары, йә туғандары, һис булмаһа, ут күршеләре әле һуғыш яланында...  Барыһы ла иҫән ҡайтһын тип теләргә генә ҡала, ә Илнарҙың рухы нисәмә ауылды туплаған йыйынға, һис шикһеҙ, шатланғандыр, иншаалаһ!

                                                                                                                                            Нәҡип ӘЙҮПОВ, Озерный ауылы