Борсолма, һалдат!

- Мин, Мулдаҡай ауылында йәшәүсе Исхакова Факия Суфьян ҡыҙы, "Яйыҡ" гәзите аша үҙемдең рәхмәт һүҙҙәремде еткерергә  теләгәйнем. Ейәнем - Сафин Руфҡәт Азамат улы Мәскәү өлкәһендә әрмелә хеҙмәт итеп ҡайтҡас "Алтын Яр" компанияһында эшләне. 2022 йылдың 28 сентябрендә махсус хәрби операцияға мобилизация менән ебәрелә. Әлеге ваҡытта ейәнем Мәскәүҙә хәрби госпиталдә дауалана. Илсеғол ауыл Советының хакимиәт башлығы Зәлифә Әбшәһитова махсус хәрби операцияла ҡатнашыусыларҙың хәлдәрен, ғаиләләренә ниндәй ярҙам кәрәклеген  һорашып, байрамдарға саҡырып, "Алтын Ярҙың" генераль директоры Рәүеф Хәкимовтың бүләктәрен тапшырып тора. Рәхмәт барыһына ла!  Минең өйөмдең, ҡаралтыларымдың электр сымдары бик иҫкергән ине. "Алтын Ярҙың" электриктары Рәсүл Кәримов  менән Батыр Тураманов 2 көн эсендә өйҙөң, соландың, мунсаның сымдарын тулыһынса алмаштырып  ҡыуандырҙылар. Бер ниндәй ҙә хаҡ алманылар.Шәхси эшҡыуарҙар ҙа онотмай: Алмас  Һағынбаев утын, бәрәңге баҡсаһы кәртәһен ипкә килтерерлек  таҡта бүлде; Руслан Рамазанов баҡсамды һөрөп бирҙе; Марат  Сиражетдинов  баҡсама 3 арба серетмә (перегной) ауҙарҙы. Берәүе лә хаҡ һораманы",- тип  мөрәжәғәт итте һәм үҙенең ҡыуаныстары, рәхмәттәре, изге теләктәре менән уртаҡлашты әңгәмәсем.
   Руфҡәт 428-се полкта хеҙмәт итә, ике тапҡыр ялға килеп китте. Ундағы хәлдәрҙе һөйләп бармай, бик ҡыҫҡа ғына яуаптар ҡайтара. Ә күреүен күп күрәлер -  батырлыҡтары өсөн байтаҡ  миҙалдар менән наградланған. Шул ғына мәғлүм:  яугирҙар гуманитар ярҙамға бик шатлана икән, тыуған яҡ сәләме итеп ҡабул итәләр. Һәм балаларҙың хаттарын, һүрәттәрен алып кинәнәләр, тәү сиратта нәҡ шул сабыйҙарыбыҙ, киләһе быуын артабан имен йәшәй алһын өсөн дә күкрәктәрен пуля аҫтына ҡуялар бит инде!

Дошман башҡа башын ҡалҡыта алмаҫлыҡ итеп дөмөктөрөп,  ЕҢЕҮ менән ҡайтыуығыҙҙы теләп ҡалабыҙ. Ә яҡындарығыҙ өсөн борсолмағыҙ, намыҫлы, ярҙамсыл яҡташтарығыҙ уларҙы хәстәрләү тураһында онотмаҫ!

                                   Мират Ғиззәтуллин. Илсеғол ауылы.

P.S. Бик хуп. БР Башлығы Р.Ф.Хәбировтың ҡарары менән МХО-ла ҡатнашыусылар һәм уларҙың ғаиләләренә булышлыҡ итеү буйынса айырым ведомство-ара республика комиссияһы булдырылды.  Шөкөр, халыҡ үҙ инициативаһы менән дә ярҙамдан өҙмәй.