Учалылар - батальондан ашыу

Учалы ҡалаһы һәм Учалы районының хәрби комиссары подполковник Сергей Симонов менән осраштыҡ.  Һүҙ РФ Ҡораллы Көстәре менән контракт нигеҙендә хеҙмәт тураһында барҙы.

Быйыл ғына 100 тирәһе Учалы кешеһе килешеү төҙөгән, МХО башланғандан алып, өлөшләтә мобилизацияланғандар менән бергә – 600-700  самаһы һалдат-офицер. Бер батальондан ашыу! Күберәген 37-42 йәштәге яҡташтарыбыҙ тәүәкәлләй икән.  Ҡалған ауылдар менән сағыштырғанда Учалы  һәм Миндәктән күберәк һәм, тәбиғи, төп өлөш – Учалы ҡалаһынан..  Төбәгебеҙ иһә, Башҡортостандың башҡа ҡала-райондары менән сағыштырғанда, контракт төҙөүселрҙең сағыштырмаса  һаны буйынса  уртала килә, ти.

-Контракт 18-60 йәштәгеләр менән төҙөлә, -ти Сергей Алексеевич.- Ниндәй һөнәргә эйә булыуына, һаулыҡ торошона ҡарап, өлкәнерәк кеше лә алыныуы  ихтимал. Был тәңгәлдә бер яңылыҡ: элек  хәрби бурысын үтәргә, йәғни сроклы хеҙмәткә саҡырылыусылар, шундуҡ Ҡораллы Көстәр менән контракт төҙөй алмай ине, хәҙер был кәртә алынды. Беҙҙең комиссариатта документ йыйыла,  һуңынан Өфөләге йыйылыу пунктына йүнәлтәбеҙ.  Контракт төҙөлөү менән  шундуҡ бер миллион һум тирәһе аҡса түләнә. Бөтә нескәлектәрҙе шәхсән осрашыу ваҡытында аңлатырбыҙ, адресыбыҙ – Учалы ҡалаһы, Тәүтөҙөүселәр урамы, 18, белешмәләр өсөн телефон -  8(34791) 6-12-41, 8-962 -525-35-62 .  Эш көндәрендә, эш сәғәттәрендә ҡабул итәбеҙ, әммә берәйһе шәмбе йә йәкшәмбе килергә булһа, дежур офицер саҡыртылып,  барыбер һөйләшәсәкбеҙ.  Ауылда йәшәгәндәр урындағы хакимиәттәр аша ла бәйләнешкә сыға алалар.

   Был хаҡта яҙған булды инде, шулай ҙа ҡабатлайыҡ.  Комиссариатҡа килгәндә паспорт, хәрби билет һәм белем тураһында документ килтерер кәрәк. Иҫәпкә ҡуйылған алкоголиктар, наркомандар алынмай, ә элек хөкөмгә тарттырылыусылар – енәйәт статьяһына ҡарап. 26 төр ауырыуҙар менән килешеү төҙөлмәй – ВИЧ, туберкулез, 1-се типтағы диабет, яман шеш, урта дәрәжәләге астма һәм башҡа.

  Контракт ваҡыты – 1,3, 5 йыл, әммә махсус хәрби операция тамамланып өлгөрмәй икән, оҙайтыла барасаҡ.

Хәрби комиссар “Рекрут” тураһында ла бәйән итте. Был проектты ойоштороусы – Рәсәй ДОСААФ-ының Башҡортостан төбәк бүлеге, Башҡортостан Башлығы Радий Хәбиров башланғысты хупланы. Рәсәй Ҡораллы Көстәренә контрактсы һалдаттарҙы йәлеп иткән ирекмәндәрҙе дәртләндереү  тураһында һүҙ.  «Рекрут» проектына ярашлы, ирекмәнгә һәр бер контрактсы өсөн 50 мең һум аҡса түләнә.  Дәүләт һәм муниципаль, хәрби һәм хоҡуҡ һаҡлау органдары хеҙмәткәрҙәренән башҡа, 18 йәше тулған һәр кем ҡатнаша ала.

«Рекрут һәм ғариза биреүсе яҡындағы ДОСААФ бүлексәһенә килә, әңгәмә үтә, унан һуң буласаҡ һалдат йәшәгән урыны буйынса хәрби комиссариатҡа мөрәжәғәт итә. Ул медицина комиссияһы үтеп, артабан контракт төҙөү өсөн республика һайлап алыу пунктына юллана», — тип асыҡлыҡ индерҙеләр «Башинформ» агентлығында. Һалдат хәрби часҡа килеү менән ирекмәнгә шунда уҡ 50 мең һум түләнәсәк.

«Рекрут» проектына ҡағылышлы бөтә һорауҙар буйынса Башҡортостандың Ситуация үҙәгенә 8 (347) 218-19-19 телефоны буйынса мөрәжәғәт итә алаһығыҙ. Ә Учалы районындағы  ДОСААФ  бүлексәһе - 8(34791)6-01-04

P.S. Контракт хеҙмәте буйынса айына  210 мең һум  түләнә тип хәбәр ителде, 40 тирәһе төрлө социаль льготалар ҡаралған. Был хаҡта, үҙебеҙҙең комиссариаттан тыш,   махсус сайтта ( башбат.рф) йәки   122,  +7(347)248-29-31 телефондары буйынса ла белешергә мөмкин.