Балҡыһын Балбыҡ!

Туңғатар ауыл хакимиәте башлығы Алмас Ғиззәтуллин “Тырыштар йәшәй бында” мәҡәләһендә беҙҙең бәләкәй генә Балбыҡ ауылы тураһында  маҡтап яҙғайны. Хаҡлы рәүештә!

Урындағы башланғыстарға булышлыҡ итеү программаһы ғәмәлгә ингәс, зыярат биләмәһен төҙөкләндерегә ҡарар иттек. Йылдан йыл йыйылыштарҙа күтәрелә килгән мәсьәлә ине. Ниһәйәт ниәтебеҙ тормошҡа ашты. Ауыл халҡы шатланып йыйылыштар үткәрҙе, инициатив төркөм булдырылды.  Эштәрәҙе башлап йөрөүсе, спонсорҙар менән бәйләнеш тотоусы Әнүзә Тереғолова “Тыуған ауылым Балбыҡ”  чатын да асты . Аҡса йыйыу әүҙемләште, һәр йорттан берәр мең һум алырға ҡарар иттек. Ә бына эшҡыуар Илшат Фәйезов үҙе үк 20 мең һум күсерҙе. Күмәкләгән көс менән зыярат тирәләй матур һәм ныҡлы текмә ҡалҡты. Ир-ат өмәгә йыйылып, сүп-сарҙы сығарҙы, бөтә биләмәне тәртипкә килтерҙе.  Ауыл халҡы эштән бик тә ҡәнәғәт ҡалып, бының менән сикләнмәҫ булды. Фельдшер-акушер пункты һәм китапхана баҡсаһының ҡоймалары ла йүнәтеү талап итә бит.   Ямғыр күп яуҙы  быйыл, көн асылғанын көтөп, йәнә ике өмә үткәрелде. Был эшкә инде бер ваҡытта ла “Юҡ”, - тип әйтә белмәгән Учалы башҡорттары ҡоролтайы Мозафар Ҡадиров төҙөлөш материалдары менән тәьмин итте....Ауылыбыҙҙа күбеһенсә оло кешеләр көн күрә, уларҙан йәмәғәт  эштәренә йыш  аҡса һорау уңайһыҙыраҡ та кеүек. Хәйер, Мозафар Харис улы  йыш ярҙам ҡулы һуҙа, рәхмәт, эштәре гел уң булһын!

Ауылдаштарҙың әүҙемлегенә һоҡланмай булмай. Хаттта, һигеҙенсе тиҫтә менән барған аҡһаҡалдарыбыҙ  ҙа өмәләрҙән ситтә ҡалмай: Ишнияз ағай Төхвәтуллин, Мәүлитбай ағай Яхин,  Таймас ағай Байрамғолов. Уҙамандар ҙа һынатмай: Ғәлимйән Аликаев, Дим Шаһиев, Хәниф Хөснөтдинов,  Марат Туҡтанов, Самат Йәнгилдин, Закир Бәхтийәров, Айрат Зарипов һәм халыҡты әйҙәп, дәртләндереп йөрөүсе старостабыҙ Илдус Сәғитов. Әлбиттә, ҡатын-ҡыҙ ҙа эштән ситтә ҡалманы -  аш-һыу әҙерләйҙәр, штакетниктарҙы буяйҙар һәм башҡа.

Күмәкләгән эш ауылдаштарҙы тағын да нығыраҡ берләштерҙе һәм илһамландырҙы, клуб баҡсаһын да ипкә килтерергә булдылар. Афарин, балҡып торһон тыуған ауылыбыҙ!

Зәһинә Байрамғолова, Балбыҡ ауылы