Шылтыратығыҙ, кәңәшләшегеҙ, ҡушылығыҙ!

Учалы тау сәнғәте колледжы студенттары  БР Дәүләт Йыйылышы – Ҡоролтайҙың Граждандар йәмғиәтен үҫештереү, мәғлүмәт сәйәсәте һәм дин эштәре буйынса комитетының рәйесе Рөстәм Ишмөхәмәтов, район хакимиәте башлығының социаль сәйәсәт буйынса урынбаҫары Гүзәлиә Шәғәлинә менән осрашты.

Ҡунаҡтар йәштәрҙе “ГосСтарт” программаһы менән таныштырҙы, кәңәштәрен бирҙеләр, тәжрибәләре менән уртаҡлаштылар.  Ҡыҙ-егеттәрҙе дәүләт һәм муниципаль хеҙмәтенә йәлеп итеүгә, ошо йүнәлештә булышлыҡ күрһәтеүгә йүнәлтелгән был проект нескәлектәре менән рәсми сайтта танышырға мөмкин  -https://госстарт.рф/.

 Беҙ иһә бер айырым урынға ентекләберәк туҡталабыҙ.
     Ҙур “ГосСтарт” проектының бер  йүнәлеше – “Доброслужащий” программаһы. Ҡыҫҡаса ғына әйткәндә – йәштәрҙе хәйриә, ирекмәнлек эштәренә йәлеп итеүҙән ғибәрәт.

Ошо сиктәрҙә  Рөстәм Рифат улы  БР Дәүләт Йыйылышы – Ҡоролтай рәйесе Константин Толкачев исеменән  МХО-ға булышлыҡ өсөн  Рәхмәт хаттары тапшырҙы, бына улар, бүләкләнеүселәр:  “Берҙәм Рәсәй” партияһының урындағы бүлексәһенең башҡарма секретары Юлизә Ҡаһарманова,  Миңлеғәле Шайморатов исемендәге штаб активистары  Эльвира Мәсәбих ҡыҙы Самихова, Рәмилә Мәүлит ҡыҙы Фәйрузова, Тәлғәт Әхмәт улы Рәхмәтуллин, Ринат  Фәнил улы Ҡужаков, Гөлнур Мөбәрәк ҡыҙы Сабирова, Шамил Зыя улы Фазылов.

Барыһы ла гуманитар ылауҙар туплауҙа һәм оҙатыуҙа, аҡса йыйыуҙа, техника ебәреүҙә, маскировка селтәрҙәре үреүҙә, блиндаж шәмдәре ҡойоу кеүек эштәрҙә ҙур әүҙемлек күрһәтәләр.

  “Труженик  тыла” төркөмөнә берләшкән ирекмәндәрҙең ҡаҙаныштары тураһында үҙебеҙ ҙә бер нисә тапҡыр яҙҙыҡ, бөгөнгө көнгә  тулайым 262 селтәр сиген ашаҡлағандар икән!  Учалы тау-байыҡтырыу комбинаты хеҙмәткәре  Тәлғәт Рәхмәтуллиндың тура ҡатнашлығында махсус хәрби операция зонаһына 17 дана төрлө техника, 30 дрон, 200 газ баллоны, өс йөҙҙән ашыу берәмек кейем-һалым ебәрелә.  Ә шулай уҡ таусы булып эшләгән (проходкалаусы)  Ринат Ҡужаков  башҡа төр кәрәк-яраҡ менән гуманитар ылауҙар туплауҙан тыш, бер “КамАЗ” таҡта ебәрә Украина яҡтарына. Ирекмән – ирекмән инде,  эштәренән бушамайынса айырым бүләкләнеүселәр тантанаға ла килә алманылар, уларға һуңыраҡ тапшырыласаҡ.

Бүләкләүҙе студенттар менән осрашыуға тура килтереү бик тә отошло килеп сыҡты. Йәштәр өсөн сағыу өлгө бит бындай ирекмәндәр.  Штаб эшмәкәрлеге тураһында бәйән итергә форсат сыға, студенттар, яу ҡырындағы  яҡташтарыбыҙға ҡалай һәм нисек булышлыҡ итә алыуҙары тураһында конкрет рәүештә белеп  ҡалдылар.

Миңлеғәле Шайморатов исемендәге штаб етәксеһе Ләйлә Садиҡова был тынғыһыҙ эшкә килгәнсе  “Район мәҙәниәт йорто” муниципаль учреждениеһында  директор вазифаһын башҡарған. МХО-ның тәүге мәленән үк  районыбыҙҙың  67 клубында ярҙам ойоштороу хәстәрләнә башланы. Шуға ла, бик яҡшы  таныш эш.

-Үҙемдең өлкән улым Санкт-Петербург хәрби академияһының 3-сө курсында,  ә кесе улым Өфөлә Муса Гәрәев исемендәге кадет корпусында, шуға ла һәр хәрби кешегә үҙ  балама кеүек ҡарайым, - ти  Ләйлә Сәлимйән ҡыҙы.- Хәйер, һәр ауыл ултырағында айырыуса выжданлы һәм тынғыһыҙ кешеләр табылып тора.  Ғәҙәттә улар  урындарҙа гуманитар ярҙам йыйыу ойоштора ла, район штабына илтәләр. Ә беҙ көн һайын тиерлек артабан, фронтҡа йүнәлтәбеҙ.  Штаб менән тура эш итеүселәр ҙә етерлек. Барыһына ла ихлас күңелдән рәхмәт әйтке килә, ошолай, күмәкләгән көс менән еңеүгә ирешербеҙ,  һәр селтәр, һәр квадрокоптер  ғәзиз улдарыбыҙҙың ғүмерен һаҡлап ҡалыуға булышлыҡ итә, ә  ниндәй ҙә булһа башҡа күстәнәс кәйефтәрен күтәрә, көнкүрештәрен яҡшырта. Иманым камил – бик тә сауаплы эш менән булабыҙ!

Иҫегеҙгә төшөрәбеҙ, штабтың адресы: Учалы ҡалаһы, 6”б” йорто (“Ветеран” клубы). Белешмәләр өсөн телефон -  89610478357. Гуманитар ярҙам эш көндәрендә (дүшәмбе – йома) 9.00-12.00,  14.00-16.00 сәғәттәрҙә ҡабул ителә.  Эске кейем-һалым, хужалыҡ тауарҙары, постель кәрәк-ярағы, гигиена саралары, медикаменттар, маскировка селтәрҙәре, бушлаттар, итек-берцылар, боҙолмай торған аҙыҡ-түлек, тәм-том – бер ни артыҡ түгел.

Шылтыратығыҙ, кәңәшләшегеҙ, ҡушылығыҙ!

P.S.Штаб етәксеһе Л.С.Садиҡова исеменә ошо көндәрҙә тура яу ҡырынан Грамота килде. 57-се айырым  гвардия  Красноград мотоуҡсылар бригадаһы командованиеһы ярҙам өсөн ихлас күңелдән рәхмәт белдерә. Ярҙамығыҙҙы бер ваҡытта ла онотмаясаҡбыҙ, беҙ Еңәсәкбеҙ, тип билдәләнә. Амин!