"Яҡшы тормош көтөп"

Яһалма Зиһенде башҡортса йырларға өйрәтеүҙе дауам итәбеҙ. Йыр көйөнсә беҙҙең ВКонтакте төркөмөндә тыңлай алаһығыҙ - https://vk.com/club165174096

Мәүлит Ямалетдиновтың шиғыры көйгә һалынды. 

Ғүмер баҡый кеше йәшәй өмөт илә:
Яҡшы тормош ана килә, бына килә.
Был – әкиәт түгел, тигән әкиәтте
Аң-тоң белмәҫ елкенсәккә барып һөйлә.
Был – әкиәт түгел, тигән әкиәтте
Аң-тоң белмәҫ елкенсәккә барып һөйлә.

Әле генә үҫмер инек. Ҡайҙа булды?
Коммунизм етә тинек. Ҡайҙа булды?
Буш хыялдар бойомдарға ашмаһа ла,
Хөкөм һөрҙө әҙ-мәҙ тиңлек. Ҡайҙа булды?
Буш хыялдар бойомдарға ашмаһа ла,
Хөкөм һөрҙө әҙ-мәҙ тиңлек. Ҡайҙа булды?

Инабатһыҙ дәүерҙәргә килеп керҙек –
Ябырыла берсә дефолт, берсә көрсөк.
Эш дәүерҙә түгел буғай. Бөйөк Тәңре
Шуны беҙгә күрһәтәлер күҙгә төртөп.
Эш дәүерҙә түгел буғай. Бөйөк Тәңре
Шуны беҙгә күрһәтәлер күҙгә төртөп.

Килде заман: йәмғиәттең эсе йомаҡ.
Ә тышта һуң? Юлда тоҙаҡ, телдә – йоҙаҡ.
Һынаған бар: бина бикле торһа оҙаҡ,
Унда һәр саҡ рәхәтләнеп үрсей ҡомаҡ.
Һынаған бар: бина бикле торһа оҙаҡ,
Унда һәр саҡ рәхәтләнеп үрсей ҡомаҡ

Донъя малы була тора, бөтә тора,
“Ышанмағыҙ! Беҙ – фани”, -тип әйтә тора.
Тик был вәғәз бер ҡолаҡтан инеп,
Икенсеһе аша сығып китә тора.
Тик был вәғәз бер ҡолаҡтан инеп,
Икенсеһе аша сығып китә тора.