«Әхирәттәр» йәнә балҡынылар

Әле яңы ғына Учалы ауылындағы район мәҙәниәт йортоноң «Әхирәттәр»  фольклор ансамбле “Байыҡ” телевизион конкурсының икенсе турында  «Йәшлегем уйындары» бейеүе менән  уңышлы сығыш яһаны, тип яҙғайныҡ. БР-ҙың атҡаҙанған сәнғәт эшмәкәрҙәре Ғәлимйән һәм Динира Хилажевтар етәкләгән коллектив йәнә оло уңышҡа өлгәште.

Ололар көнө алдынан, 30 сентябрь Өфөлә, «Торатау»  конгрес-холында “Яратам һине, тормошом” XV республика фестивале йомғаҡланды.

 Сара бик ҙур күләмдә үткәрелә: ете зона этаптарында ике меңдән ашыу 55 йәштән олораҡ һәүәҫкәр артистар   350-нән ашыу номер күрһәтә, Гала-концертҡа һөттөң ҡаймағы һөҙөп алына.

Беҙҙең “Әхирәттәр” концертта “марш” бейеп,  ҡалған номинацияларҙағы еңеүселәр менән бер рәттән Гран-при яуланылар. Ихлас ҡотлайбыҙ, артабан да оҙаҡ йылдар илһамланып, тамашасыларҙы шатландырып сәхнәләрҙә балҡырға яҙһын. “Ҡартаямы ни һуң йөрәк, маңлайҙар һырланһа ла” яуап билдәле яуап билдәле – ҡартаймай, ә сәхнәләрҙә сығыш яһаусыларҙың маңлайҙары ла тиңәдәштәренә ҡарағанда күпкә һуңыраҡ һырлана.