Фольклориада барғанда төтәп ятмайыҡ инде!

5-25 июль урмандарға кеше барыу, транспорт менән үтеү сикләнә, тип иҫкәрткәйнек инде. Кемдер, күрәһең, ҡолаҡ һалмай – урмандарыбыҙ һаман төтәй. Эх, ут менән һаҡһыҙ тотоноусылар, исмаһам, берәй тапҡыр үҙҙәре урман янғыны һүндереүгә йәлеп ителһен ине – ниндәй ауыр эш икәнлеген белерҙәр ине.....

7 июлгә БР Урман хужалығы министрлығының оператив хәбәрнамәһенән:  Учалы ауыл участка лесничествоһында 1,2 гектар майҙанда янғын һүндерелде, 25 кеше, 4 дана техника йәлеп ителә; Өргән участка лесничествоһында 1,4 гектарҙа урман яна, ут таралыу локализацияланған, 11 кеше, 2 дана техника эшләй.

Учалы лесничествоһы буйынса бүлек етәксеһе Айбулат Байғариндың  әйтеүенсә,тәүге янғын Мансур ауылы янында булһа, икенсеһе – Учалы ауылынан алыҫ түгел.

Зинһар, ут менән һаҡ булығыҙ, исмаһам, Фольклориадаға бөтә донъянан ҡунаҡтар килгәндә төтәп-һөрөм аңҡытып ятмайыҡ инде!

Берҙәм дежур-диспетчер хеҙмәте – 112, Учалы лесничествоһы – 5-27-23.