Көҙ етә, хаҡтар буй еткерә

Аҙыҡ-түлеккә хаҡ динамикаһы тураһында "Башинформ" агентлығы: "Башҡортостанда күпселек социаль әһәмиәтле аҙыҡ-түлеккә йәнә хаҡ артҡан, тип хәбәр итте республика статистиктары.

Бер аҙнала яңы өлгөргән ҡыяр һәм аҡ күсәнле кәбеҫтә 4,9 һәм 4,2 процентҡа ҡиммәтләнгән. Хәҙер республикала бер килограмм ҡыярҙың уртаса хаҡы – 56, кәбеҫтәнеке 40 һум тора.

Алма, һыйыр ите, ҡара сәй, шәкәр, бойҙай икмәге, тауыҡ, он, йомортҡа, тары ярмаһы, эремсек, тоҙ, туңдырылған балыҡ, печенье, аҡ май, шоколадлы кәнфит, ҡаймаҡ, шымартылған дөгө, сосиска, сарделька, һарыҡ ите, макарон, маргарин һәм балалар өсөн ит консерваларына ла хаҡ 0,2 – 2,4 процентҡа артҡан.

Бер аҙна эсендә арыш һәм арыш-бойҙай ононан бешерелгән икмәктең генә хаҡы үҙгәрмәгән – бер килограмы уртаса 57 һум тора.

Киреһенсә, кишер 6,7 процентҡа арзанайған, бер килограмы уртаса 86 һумға төшә.

Республикала бер аҙнала пастеризацияланған һөт, үҫемлек майы, ҡарабойҙай, йәшелсә һәм емеш-еләк консервалары, шулай уҡ колбаса, сыр, сусҡа ите, балалар өсөн ҡоро һөт ҡатышмалары, вермишель, башлы һуған, картуф, помидор 0,1 – 5,1 процентҡа осһоҙланған, тип йомғаҡ яһанылар Башстатта".

  Йомғаҡлап  үҙебеҙҙән шуны әйтер инек - миҙгеленә, һауа торошона ҡарап хаҡтар үҙгәрер инде ул. Юғиһә, паника ҡуптарырға  теләүселәр табылып ҡына тора. Шөкөр, бер кем дә ас ултырмай, магазин кәштәләре тауарҙан һығылып тора, 90-сы йылдарҙа хәл бөтөнләй икенсе ине. Хоҙай көнөн бирһә, йүнен дә бирә ул, булғандың ҡәҙерен беләйек.