Бесәнгә төшөр мәл етте

Июль аҙағы яҡынлашыуға, боронғолар әйткәнсә, бесәнгә төшөр мәл етә. 
Был ҡыҙыу мәлдә ауыл халҡы бесәнлектәрендә мәж килә.
Ҡотой ауылынан Жәүәт Янбаев Аҡбалсыҡ ерен бер итеп бесән эшләй.
- Ете баш һыйыр, алты баш башмаҡ, һарыҡтар бар. Үҙеңдең ит-майың булһа, бик шәп тә инде. Магазин әйберен ҡиммәт хаҡҡа алып ашап ултырғансы, үҙең етештергән аҙыҡ-түлеккә етәме ни? Кеше хәҙер мал көтөргә ул хәтлем атлығып бармай. Малдан яҙҙырмаһын инде, эшләгән бесәнде ашатырға яҙһын, тип йөрөлә. Балалар ярҙам итеп торалар, кейәүҙәрҙең техникаһы бар - КУН, тырма, сапҡыс. Техника керә алмағаан уындарҙы үҙем бензосапҡыс менән сабам. Емерелеп үҫмәһә лә үлән - йыйып алырлыҡ бесән бар, шөкөр, - ти Жәүәт ағай.
Рысай ауылынан Айнур Дауытов та йәйҙең аяҙ көнөн әрәм итмәй, мал аҙығы әҙерләүгә төшкән.
-Бесән наҡыҫыраҡ быйыл. Күләгәле, һаҙлы урында ғына үлән үҫкән. Ямғырҙҙан һуң ҡалҡа башланы, башлауын. Ярар әле былтырғы запас бар аҙыраҡ. Малы булмаған кешегә генә хөрриәт - һыйыр юҡ аранда, ҡайғы юҡ буранда. Бесәнде техника менән эшләйем, күпләп йылҡы аҫрайым, шуға күрә бесән күп кәрәк. Хәҙер кеше ҡул менән бесән эшләүҙе онотто бит ул - техникаң төҙөк, яғыулыҡ-майың етерлек, үҙең һау булһаң, шул еткән, - ти ул.
Тимур Әсләмов бесәнде салғы менән дә, трактор менән дә түгел, ә һуңғы ваҡытта "мода"ға инеп киткән газон сапҡыс менән саба. Мал күп булмағас, шул да етә, ти ул.
-Иртәнге сәғәт биштән тороп йөрөйбөҙ бесәнгә, эҫе төшмәҫ элек сабып, шунда уҡ тырматып, өйөп өлгөрөргә тырышабыҙ. Быйылғы һауа шарттары ауыл хеҙмәтсәнен ауыр хәлгә ҡуя. Бесәнде дымлыраҡ урында эҙләп эшләйбеҙ быйыл, - ти ул.
Әлеге ваҡытта ауыл хеҙмәтсәндәренең теләге бер - бесән тағы ла нығынып, күтәрелһен ине. Әле шыйығыраҡ шул, тип уфтаналар улар. Яуым-төшөм булһа, игене лә, бесәне лә булыр, Аллаһ бойорһа.